.webp)
متخيل أن وعيك وادراكك لنفسك وبكل حاجة حواليك سبب يخلي علاقتك بشريكك رومانسية أكتر؟
كل ما كان ذهنك صافي ونسبة إدراكك عالية كل ما هتقدر تفهم أكتر أفكارك ومشاعرك من غير ما أى حاجة منهم تشوش عليك، طب هو يعني ايه إدراك أو وعي عموماً؟ ببساطة ممكن نقول انها حالة من الوعي والتركيز، بنحس بيها لما بنكون مركزين في اللحظة اللي عايشنها دلوقتي ومدركين كل حاجة في اللحظة دي، من غير ما يتشتت انتباهنا.
أي علاقة فيها شريكين طبيعي جداً يكون بينهم أى خلافات أو تحديات، ممكن المشاكل بتاعت كل يوم وممكن تكون مشكلة كبيرة هي اللي مسيطرة على حياتهم، علشان كده لازم تتعلم ازاى تتصرف بحكمة وتستخدم وعيك، وقتها هتحس ان الدنيا أسهل، وانك قادر تستمتع باللحظة اللى بتعشها حتى في علاقتك الجنسية مع شريكك ولا ايه؟
في دراسات كتير قالت ان ممارسة تمارين التأمل بإنتظام بتساعدنا اننا نتخلص من التوتر وبتظهر فينا الجانب الإنساني في الحب والخير، كمان بتزود تركيزنا ونسبة إدراكنا بالواقع اللي حوالينا وده بيخلينا قادرين نعدي من اى ألم ممكن نحسه أو توتر ونتصرف بطريقة أحسن وأهدي في وقت المشكلة.
ممارسة تمارين التأمل ممكن تكون سبب في تحسين الوصال في علاقتك الرومانسية بشريكك، لما هتتعامل بشكل الطف مع مشاعرك وتفهمها كويس، ده هيخليك أهدي وأرق في التعامل مع شريكك حتى في وقت التنشنة اللي ممكن تحس فيه أنك مش قادر تدخل في اى حوارات وردود أفعالك مش مناسبة للموقف.
التفكير الكتير والإرهاق الذهني بيتعبنا وياخد من طاقتنا، لان طول الوقت دماغنا مش بتفصل وطبيعي هنكون متوترين أكتر، وده بيأثر على علاقتنا لشركائنا لأن التفكير الكتير والدوشة اللي في دماغنا ممكن تخلينا مش عارفين نيشوف إيجابيات العلاقة، بس تمارين التأمل ممكن تساعدك أنك تفصل شوية من التفكير الكتير في اللي حصل واللي هيحصل وتخليك تركز في دلوقتى وتفهم مشاعرك أكثر.
لما هنبص على علاقة فيها شريكين شخصيتهم مختلفة عن بعض شوية، هنلاقي ان سر نجاحهم في العلاقة هو الوعي، لانهم بيقدروا يستوعبوا اى موقف بيعدي عليهم و بيتعاملوا معاه بهدوء وباتصال بينهم وبين الواقع.
إحنا دايماً بنفكر وشاغلين دماغنا باللي فات واللي جاي وبننسي نركز في دلوقتي وفي اللحظة اللي عيشنها ودي من أهم الحاجات اللي بنطلع بيها من تمارين التأمل هي اتصالنا بنفسنا.
نوارة ومهاب متجوزين بقالهم 9 سنين وعلي مدار السنين بقيت بينهم مسافات وفي كل مرة بيبعدوا عن بعض أكتر لحد ما بقى الأطفال هما السبب الوحيد اللي بيجمعهم أو مخليهم مع بعض، نوراة ومهاب كانوا مركزين في شغلهم وبينجحوا فيه، وكان مافيش وقت يقضوا سوا مع بعض كل واحد ملهي في حياته وشغله، كانوا دايماً شايفين انه وقت وهيعدي وشوية والدنيا هتروق ليهم لكن سنة ورا سنة الوقت طال والفرصة لسه ماجتش، جربوا مرة ينزلوا ديت بس القعدة كانت كلها كلام عن أولادهم أو ماسكين الموبايلات وبيردوا على رسائل الواتساب.
نوراة ومهاب كانوا دايماً بيفكروا ومركزين في اللي حصل زمان أو في المستقبل المرتبط بأطفالهم بس نسيوا وبطلوا يركزوا في دلوقتى واللحظة اللي بيعيشوها سوا! تفتكر ازاى ممكن تكون مدرك بوعيك واحساسك باللحظة مع شريكك؟
فى حاجات كتير ممكن تعملها علشان تفصل من اى حاجة وتركز في اللحظة اللى انت فيها بكل ما فيك، من أشهر التمارين اللى ممكن تعملها انك تركز مع أنفاسك خد شهيق وزفير بعمق، ولو حسيت ان عقلك بيتشتت وبتفكر في ميت حاجة مع بعض، حاول ترجع تركيزك للحظة اللي انت فيها براحة خالص وافصل من اى دوشة، وبالمناسبة التدريب ده بنسميه " تدريب عقل القرد".
وهتلاقي على أبليكيشن ليال رحلة جميلة انا وانت وبس هتديكوا زقة كمان مع التدريب ده، وممكن كمان تعمل تمارين تانية وهي انك تخلي أدائك أبطئ من العادي في اى حاجة بتعملها فى روتين حياتك، زي الأكل، الإستحمام وغسيل الأسنان، حاول تستخدم كل حواسك وتركز في اللي بتعمله حتى لو عقلك سرح في أي موضوع حاول ترجعه للي بتعمله وتركز أكتر.
حاول تعمل التمرين ده مع شريكك لو عنده استعداد يشاركك، هو تمرين بسيط مدته 5 دقائق، اختار وقت تكون رايق فيه مش مرهق او تعبان ودور واختار مكان هادئ تقعدوا فيه من غير ما حاجة تشتتكم.
اظبط المنبه من على موبايلك يرن بعد دقيقتين، واقعدوا قدام بعض، بص لشريكك وامسك ايده وركز في ملامحه و ريحته وملمس بشرته من غير ما تتكلموا مع بعض، دخل عقلك فى مود هادي وركز في اللحظة اللي بتعشها مع شريكك ولو حسيت ان عقلك بيتشتت متسمعلهوش وركز اكتر مع شريكك.
أول ما المنبه يرن بعد دقيقتين، اتكلم مع شريكك عن التجربة واحساسك ايه و اتفقوا على وقت تكونوا فيه مع بعض وتعملوا التجربة تاني، علشان علاقتكم وصحتكم النفسية دايماً تكون احسن قربوا المسافات أكتر وركزوا في اللحظة اللي بتعيشوها سوا لان اللي فات مات واللى جاى لسه أوانه مجاش بس دلوقتي اللحظة دي، هي الأهم.
.webp)
