فريق شغّال انه يبني جسر يوصل بين كل شريك وشريك حياته علشان علاقتهم تبقى أسهل وأسعد
من أول خطوة في رحلة ليال بصينا على المجتمع المصري، بصينا على نفسنا، اهلنا، صحابنا، والدواير الأوسع من كده، ركزنا أوي وسألنا يا ترى ايه اللي بيحصل في العلاقات؟ الحلو والمر، مسئولية كل شريك في العلاقة، فكرنا ايه اللي ساعات بيقف بين شريك وشريك حياته؟ طيب ايه اللي بيسد الطريق على التواصل والود ويخلي الطريق اتجاه واحد بس مودي للخصام والفراق؟ بعدين لاحظنا إن مهم نبص للعلاقات من منظور أوسع من رؤيتنا للتحديات والمشاكل اللي فيها، فرجعنا خطوة لورا وقولنا طيب إزاي شريك يقرب لشريكه؟ يعرف يتواصل معاه بشكل أسهل وأحسن؟ إزاي الحب يزيد ومع المراحل المختلفة للعلاقة يفضل التفاهم حاضر ومؤثر؟
ومع كل خطوة بنخطيها في بحثنا وفهمنا للصورة دي، حطينا جهد كبير إننا نعمل محتوى بيحكي حواديت بيوتنا، وصحابنا وأهالينا، محتوى مبيقولش إن فيه صح وغلط ولازم وعيب وميصحش لكن بيدي الفرصة لكل شريك وشريكه يتفقوا ايه اللي ينفع وايه مينفعش، كلمات مختارينها على نار هادية علشان تلمس قلبك وتوصلك الفكرة بأسهل طريقة ممكنة.
الخطوة تجر خطوة، ودي فلسفتنا في ليال، والخطوات اللي بدأناها صغيرة معاها ووراها أحلام كبيرة. بنحلم نأثر في شكل العلاقات مش بس في مصر، في الوطن العربي، بنحلم نسيب التأثير ده بإننا ندي لكل شريك وشريكه فرصة يستخدموا أداة بسيطة زي ابليكيشن على الموبايل يعرفوا يوصلوله في أي وقت، أداة تساعدهم يعرفوا يتواصلوا مع بعض أحسن، يفهموا بعض أكتر، يتعلموا ازاي يتكلموا وقت التنشنة ويحلوا مشاكلهم، بنحلم إن ليال تبقى الجسر اللي يتبني علشان يعديهم لبعض ويساعدهم يعدوا لبعض ويكملوا سوا.
بنحلم نقدم بصورة متزنة فكرة الشراكة علشان كل طرف يعرف انه مينفعش حد يشيل لوحده، وإن لا راجل بيمشي البيت ولا ست هي اللي بتشيله على كتفها، الاتصال والوصال اللي رايح جاي بينهم هو اللي هيروق عليهم في الأيام الحلوة ويسند البيت في الأيام الصعبة.
مؤمنين إن الموضوع يستاهل، العلاقات مهمة وتستاهل نستثمر فيها طاقتنا وروحنا، تستاهل مننا كتيم ليال نبذل مجهود علشان نقدم محتوى ممكن يكون ليه دور في إنه يساعد شريك يشوف احتياجات شريكه ويقدر يلبيها، ونناقش موضوعات تقرب المسافات ونخلق مش أرضية وسط نتلاقى عليها، لكن جسر كل شريك يخطي ليه لحد ما نتلاقى.
لأننا مؤمنين إن فيه احتياج لده، العلاقات بتمر بمواسم مختلفة من أول حلاوة البدايات لحد الجواز والعيال والدوشة اللي أحياناً بتشوشر على المساحة اللي ما بين كل شريك وشريك حياته، فليال دورها مهم في المواسم دي كلها علشان يفضل فيه مساحة آمنة للشريكين يفكروا ازاي يلاقوا بعض من تاني ويطوروا علاقتهم. ولأننا مؤمنين إن آن الأوان نأكد إن "القفة ام ودنين يشيلوها اتنين" وإن العلاقات مش استثناء أبداً، فكل شريك ممكن يقدم كتير للعلاقة، وإن هنا دور ليال تساعد كل شريك يعرف ممكن يعمل ايه علشان يكون فعّال ومؤثر.
خدنا خطوات كتير علشان ليال تطلع للنور وده مكانش ممكن من غير كل فرد في فريقنا
