في ناس ممكن تشوف انها حاجة بتضيع الوقت أو أنها رفاهية أوفر مع مسئوليات الحياة، بس الحقيقة أن الأبحاث أكدت على أهمية الوقت ده مع شركائنا، لانه بيأثر بشكل إيجابي على قوة العلاقة وبيدي مساحة كويسة جداً للتواصل مع شركائنا.
لما هنقعد مع بعض نتفرج على فيلم ولا مسلسل أو حتى برنامج هنلاقي مواضيع نتكلم فيها تفصلنا عن ضغط الحياة عموماً أو حتى نضحك عليها وتعيش معانا في ذكرياتنا، ممكن مشهد معين من فيلم أو مسلسل يفكركم بحاجة قبل كده في علاقتكم أو يصحي شرارة حب جديدة أو يكون سبب فى لغة اعتذار عن موقف ما.
كان فيه شريكين قرروا أنهم يرجعوا يتفرجوا على جميع أجزاء مسلسل ليالي الحلمية، المسلسل مش اكتر حاجة رومانسية بس كان الهدف انهم يقعدوا يقضوا وقت في حضن بعض على الكنبة ويتفرجوا على المسلسل، الزوجة كانت في أول 3 شهور من الحمل، وبالصدفة المسلسل بدأ يتكلم عن الأمومة والأبوة، وبقيت الفورجة ممتعة اكتر لان حلقة ورا حلقة قصة المسلسل بقيت تشبه حياتهم وبقوا يشوفوا نفسهم فيه، وبدأ حماسهم يزيد ويفضوا وقت كل يوم يقعدوا يكملوا متابعة المسلسل، كمان ابطال المسلسل والمواقف اللى بتحصل فيه بقيت بتفتح مواضيع للنقاش بينهم.
لو انتم اصلاً كابل دمكم خفيف وبتحبوا الهزار، هتلاقوا شخصيات ومواقف مش هتعدي عليكوا كده، لازم هتقفوا عندها وتهزروا فيها أو تضحكوا سوا بصوت عالي.
علشان كده وقت الفرجة على مسلسل أو فيلم مع شريكك هو وقت مهم وإيجابي لعلاقتكم، حاول تقدر الوقت ده وتديله اهتمام اكتر بجو ومود مختلف، ممكن تهدي الإضاءة وتجهز فشار وسناكس وكأنكم في سينما، وتقربوا المسافات وتبقوا في حضن بعض، ساعتها هتحسوا سوا قد ايه الموضوع المرة دي بقى إيجابي اكتر وهتبقي خطوات ايجابية لعلاقتكم بالوصال والإتصال.
حتى لو كنتم بعاد عن بعض وبينكم بلاد، تقدروا تحسوا بالتأثير الإيجابي ده، اختاروا فيلم سوا بس المهم ان الفيلم يكون ليه علاقة بيكم، يا تري هتختاروا فيلم رومانسي؟ ولا فيلم بيفكركم بذكريات بينكم ؟ حددوا وقت تتفرجوا فيه على الفيلم اللي يعجبكم، وممكن تفضلوا مع بعض في المكالمة وانتوا بتتفرجوا، ولما الفيلم يخلص ممكن تتكلموا بعدها عن اكتر المشاهد اللي لمستكم واحساسكم كان ايه.
كل دي مشاعر وأوقات حلوة بتقوي العلاقة بيننا وبين شركائنا بالتواصل والوصال، مهما كانت الظروف أو المسافات نقدر نعمل أوقات وذكريات جميلة تحسسنا دايماً ان علاقتنا هي أهم حاجة في حياتنا. وتفضل طول الوقت مصدر سعادة وحب ودفا، دى كلها كانت طرق بتاخدكم فى مود هيغير شوية فى علاقتكم، هتلاقي حاجات أكتر على أبليكيشن ليال زي خطوة مرفوع مؤقتناً من الخدمة ممكن تخليكوا تشوفوا الوصال بعيون تانيه.
